Lúsía

Í dag er Lúsían haldin í Svíþjóð. Við vorum boðin að koma 7.15 í morgun í leikskólann til Kára, því það er hefð fyrir því að börnin syngi fyrir foreldra og systkini. Þau voru svo sæt, litlu 3-4 ára krílin, sumir í Lúsíu kjólum með ljósakórónur og aðrir eins og jólasveinar. Börnin af yngri deild og foreldrar mættu líka og horfðu á.

Eftir sönginn var okkur boðið í lúsíubollur og kaffi og kakó, rosalega huggulegt.

En ég er loksins búin í skólanum, eða svona eiginlega, þarf víst að mæta á mánudaginn. En verkefni og kynning búin og það er gott! Við Sunna fórum í Ikea í dag og þar er alltaf hægt að finna eitthvað sem mann vantar.

Ég hugsa að við förum á morgun og kaupum jólatré. Búin að kaupa eitthvað af jólaskrauti á tréð og krakkarnir fá örugglega að skreyta annað kvöld.

Svo eru bara 11 dagar til jóla, 3. jólasveinninn kemur í kvöld og 13 dagar þangað til ég get knúsað mömmu, pabba, Dýrleifu og alla hina :o)

21 dagur til jóla!

Núna er ég að reyna að hamast við að klára verkefni fyrir skólann. Þetta er það eina sem ég þarf að klára fyrir jólafrí, sem byrjar líklega hjá mér í kringum 13.des.

Úti er ekki mjög jólalegt veður, rigning og dáldið hvasst. Ég fór áðan út að hlaupa með Júlla í fyrsta skipti á ævinni. Hef ekki farið út að hlaupa síðan í menntó og þá kom ég mér oftast undan því. Þrátt fyrir þetta gekk þokkalega, fórum ca. 5 km og ég labbaði bara smá. Ætla að prófa að fara oftar og sjá hvort ég geti vanist þessu.

Við fórum með nokkrum vinum okkar á Skoppu og Skrítlu í Köben í gær og svo á eftir í jólatívolí. Alveg frábær ferð. Við stefnum að því að fara að fara oftar til Köben, höfum verið frekar löt við það. Höfum varla farið nema bara til að fara á tónleika eða til að fljúga frá Kastrup.

Við erum farin að hlakka mikið til að halda jólin hérna í Svíþjóð. Ætlum að fá okkur tré aðeins fyrr en venjulega þar sem við ætlum að fara til Íslands 26.des. Við Þórdís völdum rosalega fallegar jólakúlur í jólabúð í Tívolí. Við erum líka farin að hlakka til að hitta fjölskyldu og vini á Íslandi.